"Панцирите" непробојни за Португалија
ПОРТУГАЛИЈА - ГЕРМАНИЈА 2:3 (1:2)
Стрелци: Нуњо Гомеш 42', Постига 87' - Швајнштајгер 22', Клосе 26', Балак 61'
Стадион: Ст. Јакоб Парк во Базел. Гледачи: 50.000
Главен судија: Петер Фројдфелд од Шведска
Жолти картони: Пети, Пепе (Португалија) Лам, Фридрих (Германија)
ПОРТУГАЛИЈА:
1. Рикардо
4. Босингва
15. Пепе
16. Карваљо
2. Фереира
20. Деко
10. Мутињо
(31' - 6. Раул Меирелес)
8. Пети
(73' - 23. Постига)
7. К. Роналдо
21. Нуњо Гомеш
(67' - 19. Нани)
11. Симао
ГЕРМАНИЈА:
1. Леман
3. Фридрих
17. Мертезакер
21. Мецелдер
16. Лам
6. Ролфс
15. Хицлшпрегер
(73' - 18. Боровски)
7. Швајнштајгер
(83' - 4. Фриц)
13. Балак
20. Подолски
11. Клосе
(89' - 2. Јансен)
И покрај тоа што беа во улога на благ аутсајдер, фудбалерите на Германија уште еднаш докажаа дека се најсилни кога е најпотребно и со триумфот од 3:2 над Португалија, успеаја да станат првиот полуфиналист на 13. Европско првенство. Без повредениот Фрингс, со недоволно опоравениот Подолски и без селекторот Лев покрај клупата за резерви, Германците се надминаа себеси и сосема заслужено се радуваа на големата победа. Вистински херој на ова четвртфинале беше фудбалерот од средината на теренот на минхенски Баерн, Бастијан Швајнштајгер, кој се врати по казната од еден меч добиена поради црвениот картон против Хрватска, реализирајќи го водечкиот погодок за "панцирите", а беше асистент и на останатите два гола.
Веќеспоменатиот Швајнштајгер, кој ќе наполни 24 години за 11 дена, го отвори резултатот во 22.минута, по убавата акција на Подолски и Балак, при што асистираше неговиот соиграч од редовите на германскиот првак. Тоа како да им ги пресече нозете на евро-бразилците, кои ја немаа очекуваната креативност или подобро кажано, не добија можност да ги покажат своите квалитети поради одличната организација на играта на германскиот состав.
Веќе во 26. минута беше најавена елиминацијата на црвено-зелените, бидејќи по центаршутот на Швајнштајгер, на вистинското место беше Мирослав Клосе, кој го постигна својот прв погодок на ова ЕП и "се извади" за слабите игри во фазата по групи.
Следеше комплетна офанзива на португалскиот тим, иако Деко и Роналдо беа извонредно чувани од повеќе противнички фудбалери, а се што направија до крајот на првото полувреме беше намалување на резултатот преку Нуњо Гомеш, на три минути пред паузата.
Во вториот дел, поголем посед на топката кај Португалија, но неколкуте неискористени добри шанси беа казнети со спорниот погодок на Михаел Балак во 62. минута, кога на најдобар можен начин го искористи одличното нафрлување на Швајнштајгер од слободен удар. Сепак, голот има една голема дамка, бидејќи Балак се послужи со раце за да го оттргне од себе колегата од Челзи, Пауло Фереира, па судијата Фројдфелд ќе имаше апсолутно право доколку го поништеше.
До крајот на мечот, нападите на Португалија вродија со само еден плод, односно голот постигнат од резервистот Хелдер Постига, со глава, на три минути пред крајот. Во судиското продолжение, Германците не дозволија сериозна опасност пред голот на 38-годишниот Леман.
Во полуфиналето кое е закажано за во среда, 25 јуни, во Базел, Германија ќе се сретне со подобриот од вечерашното четвртфинале помеѓу Хрватска и Турција.